رۆژێکی گەرمی ناخۆش بوو، ئەو بیری لەوە ئەکردەوە بۆ ئەم بەیانییە ئەوەندە ناخۆشە، ئەو هەموو نەخۆشە لە کوێوە دێن؟ ناکرێت کاتژمێرێک بروات و نەخۆشێکی شێرپەنجە نەبینیت؟
لەناکاو پیاوێکی تەمەنی ٥٦ ساڵی بینی لەسەر عەرەبانەیەک دانیشتبوو، دوو دارشەقیشی بە دەستەوەبوو بۆ ئەوەی هاوکاری بێت لەسەر قاچەکانی بوەستێت. کورێکی گەنجی لەگەل بوو و ئەنجامی پشکنینەکانی لە پەنجەرەی ژورەکەوە دایە دەست ئەو بۆ ئەوەی فایلی بۆ دروست بکات. کارمەندەکە داوای ناسنامە و هەندێ بەڵگەنامەی پیاوەکە/نەخۆشەکەی لە گەنجەکە کرد. گەنجەکە لە نەخۆشەکەی پرسی داخۆ بەلگەنامەکانی پێیە، (نەخۆشەکە بۆ ئەوەی هەتاو لێی نەدات چەند مەترێک دور لە کارمەندەکە وەستابوو)، وەلامەکەی نەخێر بوو. کارمەندەکە هەندێ پرسیار دیکەی لە کوڕە گەنجەکە کرد بەڵام ئەو وتی با بانگی بکەم چونکە من نایناسم و ئەویش کەسی لەگەل نییە بۆیە من وەک خۆبەخش لەگەل ئەو پیاوە هاتووەم بۆ ئەوەی هاوکاری بکەم. ئەو بەردەوام بوو وتی من براکەم لێرەیە و نەخۆشی شێرپەنجەیەتی و لەگەڵ ئەو هاتووم ئەو پیاوەم بینی بە تەنیایە، خاوەن پێداویستی تایبەتە و شێرپەنجەشی هەیە بۆیە هاتوم کارەکانی بۆ ڕاپەرێنم.
کارمەندەکە لەگەڵ ئەو نائومێدییەی هەیبوو بەهۆی شکستی سیستەمی تەندروستی، بێدەربەستی حکومەتەکان بەرامبەر ئەو ژمارە زۆرەی توش بوی شێرپەنجە لە جیهاندا، دیمەنی ئەو هەموو نەخۆشە، توش بوون بە شیرپەنجە وەک توش بون بە درم و هەڵامەتی لێهاتووە، تەماحی کۆمپانیاکان بۆ دروستکردنی زۆرترین دەرمان و بەدەست هێنانی زۆرترین قازانج ئەو کاتەی جەستەی مرۆڤەکان بە دەرمانی کیمیای دەرزی ئاژن ئەکرێت، بازرگانیکردن بە خۆراک و دەستکاریکردنی جیناتی خواردن و نەبونی ئاسایشی خۆراک. بەڵام بوونی ئەو رۆحیەتی هاوکاری و یارمەتییەی لەو گەنجەدا بوو هێزێکی دیکە پێ بەخشی، جارێکی دیکەش دلنیا بۆوە ئێمە خەلک و گەنجی زۆر دلسۆزمان هەیە لە خۆبوردووانە و خۆبەخشانە هاوکاری خەلکانی دیکە ئەکەن.
کارمەندەکە دەستی بە کارەکانی کرد، داوای لە نەخۆشەکە کرد هەر لە سەر کورسییەکەی خۆی بە ئارامی دانیشێت و تەنیا وەڵامی پرسیارەکان بداتەوە. یەکێک لە پرسیارەکان ناو و ژمارە مۆبایلی هاوەڵی نەخۆشە، کاتێک لە نەخۆشەکەیان پرسی ناو و ژمارە مۆبایلی دایکی وت.
هەر ئەو ساتە کارمەندێکی دیکە لەبەر خۆیەوە پرسیارێکی کرد کاتێک گوێت لێی ئەبێت هەست بە ئازارێکی تیژ ئەکەیت بە دڵتا تێپەر ئەبێت. ئەو وتی: ئەبێت چەند کوڕ و کچی هەبێت و ئەویش بە تەنیا هاتووە؟ ئەبێت چەند منداڵی هەبێت و لەگەل دایکی ئەژی؟ کارمەندەکە ئاوڕی لە هاوڕێکەی دایەوە و وتی بەڵام لەوانەیە هاوسەرگیری نەکردبێت!
تێبینی/ تۆ تەنھا نیت ناوی ئەو تابلۆیەیە لێرە دامناوە، لە لایەن خاتو شیلان جەباری ئەزیز لە سالی ٢٠١٢ کێشراوە. ئەم تابلۆیە باس لە شێرپەنجە ئەکات، خەمی دو هاوڕێی وای لێ کردووە ئەم تابلۆیە بکێشێت.
