ئەو ماددە کیمیاییانەی کە لە کشتوکاڵدا بەکاری ئەهێنین، مەبەستم کشتوکاڵی پیشەسازیییە بریتییە لە ماددەی کیمیایی قڕکەر و مێروو کوژ. سەرچاوەی ئەو ماددە کیمیاییانە تاقیگەکانی هیتلەرە. ئەو قڕکەر و مێروو کوژانە هەمان ئەو کیمیاییەن بۆ کوشتنی مرۆڤەکان لە ئۆردوگاکانی کۆکردنەوەی جولەکەدا بەرهەم هات و مرۆڤیان پێکوشت.
ئەوان دوای جەنگەکان (زیاتر مەبەستی جەنگی دووەمی جیهانییە)، هەوڵیان دا بەشێک لە ماددە کیمیاییەکان بە ناوی شۆڕشی سەوزەوە بۆ جیهانی سێیەم، بگوازنەوە.
شۆڕشی سەوز مەبەست لە گۆڕانکارییەکی بەرچاوە لە کشتوکاڵدا کە بووە هۆی بەرزبوونەوەی خێرای بەرهەمهێنانی خۆراک بەتایبەت لە وڵاتانی تازەپێگەیشتودا بە بەکارهێنانی قرکەر و گیاکوژ، هەروەها بەکارهێنانی بەربڵاوی ئامێر و تەکنەلۆژیا زانستییەکان کە پێکەوە بەشدارییان لەم گۆڕانکارییەدا کرد.
داڕێژەرانی سیاسەت، ئەوان کاریگەرییە ئیکۆلۆژییەکانی ئەو ماددە کیمیاییانەیان بۆ گرنگ نەبوو، چاویان لەسەر کاریگەرییەکانی ئەو شۆرشە لەسەر برس بوون داخست، بۆیان گرنگ نەبوو چ کاریگەرییەک لەسەر جووتیاران دائەنێت، تەنیا سەیری ئەوەیان ئەکرد کە چەندە گەنم و برنج بەرهەم دێت و دێتە بازاڕەوە. هەموو ئەو بابەتە گرنگانەی پەیوەندیدارن بە خۆراک پشتگوێیان خست و تەنها ئەوەی کە گرنگ بوو بۆیان کێشی خواردنەکە بوو. (لێرەدا مەبەست لە بڕی بەرهەمهێنانە نەک جۆری خۆراک و باشی خۆراک).
خەمڵاندنی بڕی خۆراک و بە کاڵاکردنی خۆراک ڕیشەکەی لە قەیرانی خۆراکەوە سەرچاوەی گرتووە. لەم روەوە ئەوە بەهەند وەرناگیرێت کە کێڵگەی کشتوکاڵی چەند تەندروستە بۆ کشتوکاڵکردن، بیر لەوە ناکرێتەوە کە جووتیارەکان تەندروست و باشن. لە سەرانسەری جیهاندا جووتیاران ئەمرن، چونکە ناتوانن بژێوی ژیانیان دابین بکەن.
ئێستە خۆراک کاڵایەکە وەک سەرمایەیەکی دارایی مامەڵەی لەگەڵ ئەکرێت، هەڵاوسانی لە بازارەکاندا دروست کردووە بەهۆی سەرمایە داراییەکەی کە لێوەی قازانج ئەکەن، ئەمەش واتە قوڵبونەوەی جیاوازی چینایەتی، خێزانە گوندنشینەکان هەژارتر ئەبن، هەژارەکان پارەی زیاتر خەرج ئەکەن بۆ کڕینی خۆراک. هەر بۆیە پێویستە بیر لە سەروەری خۆراک بکەینەوە نەک وابەستەیی خۆراک، ئەگەر نا ئیکۆسیستەم روبەروی لەناوچوون ئەبێتەوە.
هەڵوێست بە کەمێک دەستکارییەوە، کردویە بە کوردی.
